A mañá do pasado 28 de novembro visitou o noso centro o
escritor e xornalista Luís Rei Núñez (A Coruña, 1958), un dos autores máis
importantes da narrativa galega dos últimos lustros.
Por espazo dunha hora, Rei Núñez impartiu unha conferencia
ao alumnado de 3º e 4º da ESO con motivo da recente aparición do seu libro de
relatos Días que non foron, publicado
por Edicións Xerais de Galicia. Esta obra foi obxecto de lectura por parte do
alumnado, que tivo así a oportunidade de coñecer por voz do propio autor moitas
das claves que explican o particular territorio narrativo que nela se
desenvolve.
Mais Rei Núñez falou tamén do oficio da escrita, da
importancia que a literatura ten na vida dos seres humanos e, particularmente,
de como esta pode axudar aos que están a se formar a contemplar a realidade e
vela con ollada renovada.
Tras a súa intervención, as alumnas e alumnos estiveron a
dialogar co escritor, que respondeu diversas preguntas tanto sobre pormenores
relativos á elaboración de Días que non
foron coma outras cuestións referidas ás súas preferencias autoriais, os
proxectos nos que anda embarcado e mesmo os consellos que este quixo dar a
aquelas e aqueles que se inician na escrita.
Unha xornada agradabilísima que sen dúbida deixou un moi bo
sabor de boca a todos os asistentes, entre os que se contaba tamén diverso
profesorado do centro, amais do compañeiro Armando Requeixo, que oficiou como
presentador do acto.
O noso centro quere dar as grazas a Luís Rei Núñez pola
xentileza de nos visitar e dedicarnos o seu tempo e saber, ao tempo que lle
desexamos moitos éxitos tanto co seu Días
que non foron (do que podedes ler o primeiro dos relatos aquí) coma coas futuras obras que anda xa a ultimar.
Ningún comentario:
Publicar un comentario