A primavera vai timidamente achegándose e
tráenos novas lecturas. Nesta ocasión, pola porta da nosa Biblioteca entraron
distintos materiais ben interesantes para traballar cos diferentes niveis de
alumnado do centro.
Os máis pequenos teñen xa á súa disposición unha
singular baralla para aprenderen ludicamente nos recreos. Trátase da ‘baralla sueva’, as cartas de toda a vida cunha peculiaridade: en vez das imaxes
francesas de reis, cabaleiros e valets ás que estamos afeitos, traen debuxados
reis da vella Gallaecia, co que as nosas pequenas e pequenos aprenderán a
curiosear na nosa Historia divertíndose.
Para os máis maiores (e, sobre todo, para o
profesorado dos distintos ciclos e niveis) a Biblioteca conta xa con
bibliografía sobre Xosé María Díaz Castro (Guitiriz, 1914-1990), o autor
homenaxeado no Día das Letras Galegas do 2014. Neste sentido, pode ser de
utilidade Vida e obra de Xosé María Díaz Castro (Galaxia) e mais o cartafol con materiais sobre o escritor Xosé Mª Díaz Castro. Nimbos de luz na Insua dos Poetas (Tórculo), coordinado este último por Luís González Tosar.
Finalmente, para todos os públicos temos unha
novidade literario-musical, os CoraSons
que publicou Kalandraka, un libro-disco no que se recollen temas dunha trintena
de cantantes galegos e da lusofonía (Portugal e Brasil principalmente). Así que
xa sabedes, polo oído tamén entre a letra.
Animádevos a visitar a Biblioteca e pedide aos
seus encargados as novidades. Hai un mundo de palabras (e músicas) agardando
por todos vós!
Ningún comentario:
Publicar un comentario